28. mars 2022 /
Heilbrigðisráðuneytið

Yfirlýsing norrænna heilbrigðisráðherra um viðbúnað gegn heilbrigðisvá

Frá undirritun sameiginlegrar yfirlýsingar norrænna heilbrigðisráðherra
Stjórnarráðið
Frá undirritun sameiginlegrar yfirlýsingar norrænna heilbrigðisráðherra

Heilbrigðisráðherra Norðurlandanna vilja efla norrænt samstarf til að styrkja heilbrigðisviðbúnað og viðnámsþol Norðurlandaþjóðanna og Evrópu í heild. Willum Þór Þórsson heilbrigðisráðherra sótti fund norrænna heilbrigðisráðherra í Stafangri fyrir helgi þar sem ráðherrarnir undirrituðu sameiginlega yfirlýsingu þessa efnis. Yfirlýsingin byggir á sameiginlegri yfirlýsingu forsætisráðherra Norðurlandaþjóðanna um eflingu norrænna almannavarna.

Fyrir undirritun yfirlýsingarinnar áttu ráðherrarnir rafrænan fund með Stellu Kyriakides, framkvæmdastjóra heilbrigðis- og fæðuöryggismála hjá Evrópusambandinu þar sem rætt var um möguleikana á nánara norrænu samstarfi og hvað Norðurlönd geti lagt til heilbrigðisviðbúnaðar í Evrópusambandinu. Meðal annars var fjallað um þau úrlausnarefni sem fylgt hafa heimsfaraldri COVID-19 og einnig í tengslum við ástandið í Úkraínu. Þeir eru sammála um að Norðurlandaþjóðirnar geti margt lært hver af annarri í ljósi reynslunnar og að Evrópusamstarf hafi reynst nauðsynlegt til að takast á við þá vá sem Norðurlandaþjóðirnar og Evrópa í heild hafa staðið frammi fyrir. Í sameiginlegri yfirlýsingu þeirra er því lögð áhersla á að aukið norrænt samstarf um heilbrigðisviðbúnað sé liður í evrópsku samstarfi. 

Aukið samstarf á mörgum sviðum

Heilbrigðisráðherrarnir vilja aukinn kraft í samstarf um viðbúnað í heilbrigðismálum á nokkrum sviðum eins og fram kemur í yfirlýsingu þeirra. Eru þar sérstaklega nefnd skipti á heilbrigðisgögnum, viðvarandi stöðumat, aukin samskipti, samræmdar viðbúnaðaræfingar og miðlun reynslu og sameiginlegar rannsóknir til að kortleggja nýsköpun og getu til þróunar og framleiðslu á bóluefnum. Þess má geta að fyrr á þessu ári ákváðu Norðurlandaþjóðirnar að ráðast í greiningu á sameiginlegri getu sinni til að þróa og framleiða bóluefni og fýsileika norræns samstarfs til nýsköpunar á því sviði. Gert er ráð fyrir að sameiginleg skýrsla Norðurlandaþjóðanna um þetta efni verði tilbúin í maí næstkomandi og að tillögur til norrænu ráðherranna um samstarf á þessu sviði verði kynntar í framhaldinu.

Yfirlýsing norrænu heilbrigðisráðherra ásamt nánari upplýsingum um fund þeirra er aðgengileg á vef norrænu ráðherranefndarinnar

Var efnið hjálplegt?