24. maí 2022 /
Mennta- og barnamálaráðuneytið

Nýsköpunarkeppni grunnskóla 2022

Ásmundur Einar Daðason, Hilda Rún Hafsteinsdóttir, Thelma Sif Róbertsdóttir og Sófús Árni Hafsteinsson
Ásmundur Einar Daðason, Hilda Rún Hafsteinsdóttir, Thelma Sif Róbertsdóttir og Sófús Árni Hafsteinsson

Ásmundur Einar Daðason, mennta- og barnamálaráðherra, afhenti verðlaun fyrir nýsköpun í Nýsköpunarkeppni grunnskóla á laugardag. Hilda Rún Hafsteinsdóttir og Thelma Sif Róbertsdóttir í 7. bekk Sandgerðisskóla hlutu aðalverðlaun fyrir hugmynd sína Hjálparljós. Ásta Sigríður Ólafsdóttir, grunnskólakennari í hönnun og smíði í Víðistaðaskóla, er Nýsköpunarkennari grunnskólanna árið 2022.

Nýsköpunarkeppni grunnskólanna er hugmyndasamkeppni fyrir nemendur í 5.–7. bekk grunnskóla. Krakkarnir útfærðu hugmyndir sínar á vinnustofum í tvo daga og fór keppnin fram laugardaginn 21. maí í Háskólanum í Reykjavík.


Allir þátttakendur

Mennta- og barnamálaráðuneytið er eigandi Nýsköpunarkeppni grunnskólanna. Menntavísindasvið Háskóla Íslands annast rekstur keppninnar í samstarfi við Háskólann í Reykjavík, Samband íslenskra sveitarfélaga, Arion banka, Samtök Iðnaðarins, ELKO, IKEA, grunnskóla o.fl. Verndari Nýsköpunarkeppni grunnskólanna er forseti lýðveldisins, Guðni Th. Jóhannesson.

Hilda og Thelma fengu fartölvur í verðlaun. Aðrir verðlaunahafar fengu 25 þúsund króna inneign í Elko. Ásta Sigríður Ólafsdóttir, handhafi hvatningarverðlauna kennara, hlaut að launum 150.000 kr. í boði Samtaka iðnaðarins.

Var efnið hjálplegt?