17. maí 2023 /
Forsætisráðuneytið

Forsætisráðherra fundaði með forsætisráðherrum Írlands og Lúxemborgar

Katrín Jakobsdóttir forsætisráðherra og Xavier Bettel, forsætisráðherra Lúxemborgar.
Katrín Jakobsdóttir forsætisráðherra og Xavier Bettel, forsætisráðherra Lúxemborgar.

Katrín Jakobsdóttir forsætisráðherra átti fundi með forsætisráðherrum Írlands og Lúxemborgar að loknum leiðtogafundi Evrópuráðsins í dag. Leiðtogafundurinn og niðurstöður hans voru m.a. ræddar á fundunum.

Samstarf og samskipti Íslands og Írlands voru þar að auki til umræðu á fundi forsætisráðherra og Leo Varadkar, forsætisráðherra Írlands. Á fundinum skrifuðu forsætisráðherrarnir undir sameiginlega yfirlýsingu um að efla samstarf ríkjanna og er þar m.a. horft til málefna hafsins, háskólasamstarfs, grænna orkulausna og samstarfs á alþjóðavettvangi.

Á fundi forsætisráðherra og Xavier Bettel, forsætisráðherra Lúxemborgar, var rætt um samskipti ríkjanna og möguleika á auknu samstarfi á sviðum sjálfbærrar orkunýtingar, háskóla og rannsókna og skapandi greina.

Loks átti forsætisráðherra fund með Lindu Thomas-Greenfield, sendiherra Bandaríkjanna hjá Sameinuðu þjóðunum, sem var fulltrúi Bandaríkjanna á leiðtogafundinum. Þær ræddu niðurstöður leiðtogafundarins og mikilvægi hans. Þar ræddu þær einnig samskipti Íslands og Bandaríkjanna, sérstaklega á sviði mannréttinda.

Var efnið hjálplegt?