Efnisorð
Tegund

Leita eftir efnisorðum

Sýnir 751–800 af 2063
Raða eftir:
10. ágú. 2021Heilbrigðisráðuneytið, Covid-19, Líf og heilsa

COVID 19: Bólusetningar 12-15 ára barna hefjast í ágúst

Heilbrigðisráðherra hefur fallist á tillögu sóttvarnalæknis um að gefa börnum á aldrinum 12 til 15 ára kost á bólusetningu við Covid-19 með það að markmiði að veita þeim vörn gegn sjúkdómnum. Bólusett verður með bóluefni Pfizer þar sem meiri reynsla er fyrirliggjandi um bólusetningar þessa aldurshóps með því efni en bóluefni Moderna sem einnig hefur fengið markaðsleyfi til notkunar fyrir börn á þessum aldri. Ef allir þiggja boð um bólusetningu þarf um 35.000 bóluefnaskammta til að fullbólusetja allan aldurshópinn. Miðað við birgðir af Pfizer og afhendingaráætlanir á næstu vikum ætti að vera unnt að ljúka bólusetningu hópsins með síðari bólusetningu um miðjan september.

10. ágú. 2021Heilbrigðisráðuneytið, Covid-19, Líf og heilsa

COVID-19: Framvinda aðgerða til að styðja við heilbrigðiskerfið í heimsfaraldri

Heilbrigðisráðuneytið í samvinnu við Landspítala, heilbrigðisstofnanir og fleiri aðila, vinnur nú að ýmsum aðgerðum sem miða að því að styðja við Landspítala, styrkja getu hans til að takast á við kórónaveirufaraldurinn og sinna annarri mikilvægri þjónustu við sjúklinga. Ráðuneytið hefur fengið til starfa tímabundið Vilborgu Hauksdóttur, fyrrverandi skrifstofustjóra í ráðuneytinu, til að liðsinna við áætlanir og framkvæmd þessara aðgerða í samvinnu við hlutaðeigandi stjórnendur og ábyrgðaraðila.

10. ágú. 2021Líf og heilsa, Covid-19, Heilbrigðisráðuneytið

COVID-19: Óskað eftir fleirum á skrá í bakvarðasveit heilbrigðisþjónustunnar

Um 120 einstaklingar úr tíu heilbrigðisstéttum eru nú skráðir í bakvarðasveit heilbrigðisþjónustunnar. Heilbrigðisstofnanir, einkum Landspítali, eru nú undir miklu álagi vegna Covid-19 og því þörf á frekari stuðningi við mönnun. Heilbrigðisráðuneytið hvetur heilbrigðisstarfsfólk sem vill og getur ráðið sig til tímabundinna starfa í heilbrigðisþjónustu ef eftir því er óskað, til að skrá sig í bakvarðasveitina. Sérstaklega er óskað eftir hjúkrunarfræðingum, sjúkraliðum og læknum á skrá.

01. júl. 2021Heilbrigðisráðuneytið, Líf og heilsa

Ákvörðun tekin um að hefja undirbúning á að rannsóknir á leghálssýnum verði fluttar til Landspítala

Heilsugæsla Höfuðborgarsvæðisins, hefur tekið ákvörðun um að hefja undirbúning á að rannsóknir á leghálssýnum verði fluttar til Landspítalans. Ákvörðunin byggist á því að Landspítali telur sig nú geta sinnt rannsóknunum en einnig til að koma til móts við athugasemdir fagaðila og almennings. Áður en af flutningi verður er mikilvægt að öllum undirbúningi sé lokið og öllum nauðsynlegum forsendum fullnægt, hvort sem er HPV mælingar eða skoðun frumusýna,

30. jún. 2021Heilbrigðisráðuneytið, Líf og heilsa

Næringaruppbót niðurgreidd fyrir fyrirbura

Sjúkratryggingum Íslands er nú heimilt að veita styrki til kaupa á næringaruppbót fyrir fyrirbura sem fæðast fyrir 32 vikna meðgöngu og þarfnast næringaruppbótar þar til þeir hafa náð 40 vikna meðgöngualdri. Reglugerð heilbrigðisráðherra sem kveður á um þetta hefur tekið gildi. Kostnaður foreldra sem hingað til hafa greitt næringaruppbótina að fullu nemur um 60.000 krónum. Styrkur samkvæmt reglugerðinni nemur 57.300 krónum en það sem út af stendur greiða foreldrarnir sjálfir.

29. jún. 2021Heilbrigðisráðuneytið, Heilbrigðismál, Líf og heilsa

Stefnt að opnun dagdvalarrýma í Suðurnesjabæ

Heilbrigðisráðherra hefur ákveðið, að ósk bæjaryfirvalda í Suðurnesjabæ, að taka upp viðræður um að koma á fót allt að átta almennum dagdvalarrýmum fyrir aldraða í sveitarfélaginu. Gert er ráð fyrir að reksturinn verði fjármagnaður með daggjöldum sem ríkið greiðir en að sveitarfélagið leggi til húsnæðið og beri ábyrgð á rekstrinum. Ljóst er að þörf er fyrir fjölgun dagdvalarrýma í heilbrigðisumdæmi Heilbrigðisstofnunar Suðurnesja sé horft til nýtingar þeirra rýma sem eru fyrir hendi og mannfjölda í umdæminu.

29. jún. 2021Heilbrigðisráðuneytið, Heilbrigðismál, Líf og heilsa

Kvennamóttaka sett á fót hjá Heilsugæslu höfuðborgarsvæðisins

Svandís Svavarsdóttir heilbrigðisráðherra hefur ákveðið í samráði við Heilsugæslu höfuðborgarsvæðisins að ráðast í tilraunaverkefni um sérstaka móttöku fyrir konur innan heilsugæslunnar. Þetta er gert þar sem vísbendingar eru um að þörfum kvenna fyrir heilbrigðisþjónustu þegar um ræðir sértæk heilsufarsvandamál kvenna, sé ekki mætt sem skyldi. Heilsugæslan hefur fengið 60 milljóna króna viðbótarframlag vegna verkefnisins, þar af fær Þróunarmiðstöð íslenskrar heilsugæslu 15 milljónir króna. Hlutverk þróunarmiðstöðvarinnar verður að tryggja þekkingaröflun á þessu sviði og koma þeim á framfæri á landsvísu.

28. jún. 2021Heilbrigðisráðuneytið, Líf og heilsa

Vinnustofa um rétta geðheilbrigðisþjónusta á réttum stað

Um 100 fulltrúar veitenda geðheilbrigðisþjónustu og notenda þjónustunnar komu saman á vinnustofu nýverið í þeim tilgangi að rýna þjónustuferla í geðheilbrigðisþjónustu og gera tillögur að úrbótum. Markmiðið er að bæta þjónustu við fólk með geðrænan vanda, auka skilvirkni hennar og draga úr biðlistum. Landspítalinn annaðist skipulag og utanumhald vinnustofunnar sem efnt var til að frumkvæði heilbrigðisráðuneytisins.

28. jún. 2021Heilbrigðisráðuneytið, Heilbrigðismál, Líf og heilsa

Blóðgjafafélagið styrkt um hálfa milljón á afmælisári

Þann 15. júlí næstkomandi eru 40 ár liðin frá formlegri stofnun Blóðgjafafélags Íslands. Í tilefni afmælisársins hitti Svandís Svavarsdóttir heilbrigðisráðherra forsvarmenn félagsins í liðinni viku og veitti félaginu 500.000 króna styrk. Blóðgjafafélagið hefur það markmið að efla blóðgjafastarfsemi og gæta hagsmuna blóðgjafa. Félagið sinnir öflugu kynningarstarfi og vinnur markvisst að því að fjölga blóðgjöfum, enda mikið í húfi eins og endurspeglast í kjörorði félagsins; Blóðgjöf er lífgjöf. Til að mæta þörf fyrir blóðgjöf hér á landi þarf Blóðbankinn um 12.000 blóðgjafir á ári, eða um 250 blóðgjafir á viku.

24. jún. 2021Heilbrigðisráðuneytið, Covid-19, Líf og heilsa

COVID-19: Ákvæði um forgangsröðun við bólusetningu afnumin

Samkvæmt áætlun verður í lok þessarar viku búið að bjóða öllum bólusetningu gegn Covid-19 sem skilgreindir eru í forgangshópum samkvæmt gildandi reglugerð um bólusetningar. Heilbrigðisráðherra hefur ákveðið að fella brott ákvæði reglugerðar sem kveður á um forgangshópa. Bólusetning gegn Covid-19 byggist þar með á sömu reglugerðarheimildum og bólusetning við öðrum smitsjúkdómum hér á landi. Með þessari reglugerðarbreytingu verður ákvörðun um bólusetningu vegna Covid-19 alfarið á forræði sóttvarnalæknis samkvæmt læknisfræðilegu mati hverju sinni.

23. jún. 2021Heilbrigðisráðuneytið, Líf og heilsa

Umsækjendur um embætti skrifstofustjóra á skrifstofu innviða heilbrigðisþjónustu

Alls bárust 18 umsóknir um embætti skrifstofustjóra skrifstofu innviða heilbrigðisþjónustu í heilbrigðisráðuneytinu. Umsóknarfrestur rann út 21. júní síðastliðinn. Hæfnisnefnd skipuð þremur einstaklingum mun nú meta hæfni umsækjenda og skila greinargerð til heilbrigðisráðherra. Nefndin starfar samkvæmt reglum um ráðgefandi nefndir um embætti við Stjórnarráð Íslands.

23. jún. 2021Heilbrigðisráðuneytið, Covid-19, Líf og heilsa

COVID-19: Hraðpróf í heilsugæslu

Heilsugæslan hefur tekið í notkun hraðpróf til greiningar á kórónuveirunni sem veldur Covid-19. Hraðprófin eru ekki notuð við einkennasýnatöku, heldur eru þau eingöngu ætluð þeim sem þurfa á þeim að halda, t.d. vegna ferðalaga, þar sem krafist er neikvæðrar niðurstöðu úr sýnatöku á landamærum og niðurstaða úr hraðprófi er tekin gild. Gjald fyrir sýnatöku með hraðprófi er 4.000 krónur, hvort sem hlutaðeigandi einstaklingur er sjúkratryggður hér á landi eða ekki.

16. jún. 2021Heilbrigðisráðuneytið, Líf og heilsa

Hækkun styrkja til kaupa á hjálpartækjum 1. júlí

Fjárhæðir styrkja vegna kaupa á hjálpartækjum hækka umtalsvert 1. júlí með nýrri heildarreglugerð heilbrigðisráðherra. Með reglugerðinni eru styrkirnir færðir upp til verðlags sem ekki hefur verið gert frá árinu 2008. Áætlað er að framlög til niðurgreiðslu vegna kaupa á hjálpartækjum aukist með þessu um 214 milljónir króna á ársgrundvelli. Um er að ræða hjálpartæki sem auðvelda fólki að takast á við athafnir daglegs lífs.

15. jún. 2021Heilbrigðisráðuneytið, Líf og heilsa

Til umsagnar: Framtíðarskipulag heilbrigðisþjónustu við börn og ungmenni með neyslu- og fíknivanda

Birt hefur verið til umsagnar skýrsla starfshóps heilbrigðisráðherra með tillögum að heildstæðu framtíðarskipulagi heilbrigðisþjónustu fyrir börn og ungmenni með neyslu- og fíknivanda. Þar eru m.a. skilgreind viðfangsefni fyrsta, annars, og þriðja stigs heilbrigðisþjónustu út frá samfelldum forvörnum til endurhæfingar og bata. Til grundvallar tillögunum liggur samþætting fræðilegra kenninga og þekkingar um þróun vímuefnanotkunar barna og ungmenna og samspil áhættu og verndandi þátta í því ferli. Frestur til að skila umsögnum er til 29. júní næstkomandi. Í framhaldinu mun heilbrigðisráðuneytið vinna aðgerðaáætlun um framkvæmd tillagnanna.

12. jún. 2021Heilbrigðisráðuneytið, Líf og heilsa

Lýðheilsustefna til ársins 2030 samþykkt á Alþingi

Samþykkt var á Alþingi í dag tillaga Svandísar Svavarsdóttur heilbrigðisráðherra til þingsályktunar um lýðheilsustefnu til ársins 2030. Tillagan var samþykkt samhljóða með öllum greiddum atkvæðum. Lýðheilsustefnan á sér stoð í heilbrigðisstefnu þar sem fram koma þau markmið að lýðheilsustarf með áherslu á heilsueflingu og forvarnir verði hluti af allri heilbrigðisþjónustu og þá sérstaklega þjónustu heilsugæslunnar. Lýðheilsustefnan er liður í því að ná þessu markmiði, jafnframt því að stuðla að markvissri umræðu um lýðheilsu í samfélaginu. Með lýðheilsu er vísað til heilsueflingar og forvarna sem miða að því að viðhalda og bæta heilbrigði fólks og koma í veg fyrir sjúkdóma eins og kostur er.

12. jún. 2021Heilbrigðisráðuneytið, Líf og heilsa

Frumvarp um iðnaðarhamp orðið að lögum

Alþingi samþykkti í dag frumvarp heilbrigðisráðherra um breytingu á lögum um ávana- og fíkniefni sem felur í sér að stjórnsýsla og verkefni sem varða innflutning á hampfræjum til ræktunar á iðnaðarhampi flyst frá Lyfjastofnun til Matvælastofnunar. Við lagasetninguna var horft til þess að iðnaðarhampur er ekki ávana- og fíkniefni heldur nytjaplanta og því eðlilegra að fræ til ræktunar á honum falli undir lög um eftirlit með fóðri, áburði og sáðvöru sem Matvælastofnun hefur eftirlit með.

11. jún. 2021Heilbrigðisráðuneytið, Covid-19, Líf og heilsa

COVID-19: Óbreyttar reglur á landamærum til 1. júlí

Heilbrigðisráðherra hefur ákveðið í samræmi við tillögu sóttvarnalæknis að halda óbreyttu fyrirkomulagi sóttvarnaaðgerða á landamærum til 1. júlí næstkomandi. Frá þeim tíma verður slakað á aðgerðum, þar sem hætt verður að skima þá sem framvísa vottorðum um bólulsetningu eða fyrri sýkingu af völdum Covid-19. Einnig verður hætt að skima börn fyrir Covid-19 við komuna til landsins.

11. jún. 2021Heilbrigðisráðuneytið, Covid-19, Líf og heilsa

COVID-19: Almennar fjöldatakmarkanir verða 300 manns og nándarregla 1 metri

Frá og með 15. júní fara fjöldatakmörk úr 150 manns í 300 og nándarregla verður 1 metri í stað tveggja. Á sitjandi viðburðum verður engin nándarregla en öllum skylt að bera grímu. Opnunartími veitingastaða lengist um klukkustund, þ.e. til miðnættis. Heilbrigðisráðherra hefur ákveðið þessar breytingar á reglugerð um takmarkanir á samkomum innanlands og eru þær í samræmi við tillögur sóttvarnalæknis.

09. jún. 2021Heilbrigðisráðuneytið, Líf og heilsa, Landsráð

Fyrsti fundur landsráðs um mönnun og menntun í heilbrigðisþjónustu

Landsráð um mönnun og menntun í heilbrigðisþjónustu hefur tekið til starfa og hélt sinn fyrsta fund í vikunni. Það er skipað af heilbrigðisráðherra og er ætlað að vera ráðgefandi fyrir undirbúning ákvarðana á sviði mönnunar og menntunar í heilbrigðisþjónustu, auk þess að vera samráðsvettvangur á breiðum grundvelli um þessi mál. Á fyrsta fundi landsráðsins var starfið framundan skipulagt með hliðsjón af skipunarbréfi og rætt um helstu áherslumál við upphaf vinnunnar. Gert er ráð fyrir að landsráð skili heilbrigðisráðherra ár hvert tillögum að áætlun um aðgerðir í þágu mönnunar og menntunar í heilbrigðisþjónustu. Formaður landsráðsins er Bára Hildur Jóhannsdóttir.

09. jún. 2021Heilbrigðisráðuneytið, Líf og heilsa

Ákvörðun um byggingu heilsugæslustöðvar í Reykjanesbæ

Heilbrigðisráðherra hefur tekið ákvörðun um byggingu nýrrar heilsugæslustöðvar í Innri-Njarðvík í Reykjanesbæ sem á að þjóna um 15.000 íbúum. Húsnæði stöðvarinnar verður um 1.350 fermetrar. Ríkissjóður fjármagnar framkvæmdina að fullu en Reykjanesbær leggur til lóðina og liggur fyrir ákvörðun um að heilsugæslustöðin verði reist við Tjarnarbraut/Njarðarbraut. Mikil þörf er á bættri aðstöðu fyrir heilsugæsluþjónustu á svæðinu því naumur húsakostur stendur þjónustunni fyrir þrifum og hefur þurft að sinna hluta heilsugæsluþjónustunnar í bráðabirgðaaðstöðu við sjúkrahús Heilbrigðisstofnunar Suðurnesja.

09. jún. 2021Heilbrigðisráðuneytið, Líf og heilsa

Skýrsla til umsagnar: Þjónusta við einstaklinga með langvinna verki

Starfshópur sem heilbrigðisráðherra fól að afla upplýsinga um meðferð fyrir einstaklinga með langvinna verki hefur skilað ráðherra skýrslu með niðurstöðum sínum og tillögum til úrbóta. Skýrslan er hér með birt til umsagnar í samráðsgátt. Á grundvelli skýrslunnar og umsagna um hana mun ráðuneytið móta áætlun um aðgerðir til næstu ára til að hrinda úrbótum í framkvæmd. Liður í verkefni starfshópsins var að greina fjölda, aldur og kyn þeirra sem eiga við langvinna verki að stríða, auk þess að kortleggja þá meðferð sem stendur til boða og hvar hún er veitt.

08. jún. 2021Heilbrigðisráðuneytið, Líf og heilsa

Ráðherra úthlutar 28 milljónum króna í gæða- og nýsköpunarstyrki

Svandís Svavarsdóttir heilbrigðisráðherra hefur úthlutað rúmum 28 milljónum króna í gæða- og nýsköpunarstyrki til 13 verkefna. Að þessu sinni var sérstök áhersla lögð á verkefni sem nýtast heilbrigðisþjónustunni í kjölfar heimsfaraldurs. Verkefnin þurftu að hafa skýran ávinning fyrir heilbrigðisþjónustuna og þann hóp sem þjónustan beinist að. Styrkirnir voru veittir á sameiginlegri ráðstefnu heilbrigðisráðuneytis og Landspítala 1. júní sl. þar sem fjallað var um þróun heilbrigðisþjónustu á tímum breytinga og þar voru verkefnin sem hlutu styrki kynnt.

01. jún. 2021Heilbrigðisráðuneytið, Lyfjamál, Líf og heilsa

Aukið alþjóðlegt samstarf á sviði lyfjamála

Fimm þjóðir hafa ákveðið að ganga inn í alþjóðlegt samstarf Norðurlandaþjóða (Nordisk Lægemiddel Forum) á sviði lyfjamála. Þetta eru Belgía, Holland, Austurríki, Írland og Lúxemborg sem áður hafa starfað saman undir heitinu „Beneluxa Initiative.“ Samstarfið snýr einkum að verkefnum sem tengjast innleiðingu nýrra lyfja. Þörf fyrir alþjóðlega samvinnu verður sífellt meiri vegna þeirra áskorana sem yfirvöld standa frammi fyrir gagnvart lyfjaverði, greiðsluþátttöku og innkaupum á lyfjum. Markmiðið er að tryggja sjúklingum aðgang að nýjum lyfjum með markvissu samstarfi þjóðanna um áhrifaríkar og skynsamlegar leiðir.